Ağdaş rayon Mərkəzləşdirilmiş Kitabxana Sistemində 26 Fevral – Xocalı Soyqırımının 29-cu ildönümü münasibətilə  “Xocalı-29” adlı videokonfrans keçirilib. Konfransa Mərkəzi kitabxananın  və 30-dək  filial kitabxanaların işçiləri qoşulub.

        Tədbiri giriş sözü ilə MKS-nin direktoru Seyfəddin Feyzullayev açaraq qeyd edib ki, Xocalı faciəsi XX əsrin ən dəhşətli faciələrindən biridir. İllər ötsə də bu faciənin vurduğu yara sağalmazdır.

      MKS-nin oxuculara xidmət şöbəsinin əməkdaşı Vüsalə Məmmədova  Xocalı faciəsinin baş verdiyi tarixə qayıdaraq 1992- ci ilin fevral ayının 25-dən 26 na keçən gecədə ermənilərin törətdiyi insanlığa sığmayan vəhşiliklərdən, azərbaycanlılara tutulan divanlardan, məhv olmuş yurd yerlərindən danışıb.

     Aralbir kənd kitabxanasının əməkdaşı Nurlanə Bayramova Xocalı faciəsi zamanı Azərbaycanın Milli Qəhrəmanı  Əlif  Hacıyevin  göstərdiyi qəhrəmanlıqdan söhbət açıb.

    65 saylı şəhər kitabxanasının  işçisi  Səbinə Lətifova, 62 saylı şəhər, Aşağı Zeynəddin, Orta Qəsil kənd  kitabxanalarının fəal  oxucuları  Xocalıya həsr olunmuş şeirlər səsləndiriblər.

     Qaradağlı  kənd  kitabxanasının əməkdaşı Umarova  Rəsmiyyə Xocalı soyqırımı barədə öz fikirlərini söyləyib.

   Tədbirin sonunda Seyfəddin  Feyzullayev  Xocalı faciəsinin 29-cu ildönümü ilə əlaqədar filiallar tərəfindən hazırlanmış və  sosial şəbəkələrdə paylaşılmış videoçarxlar barədə məlumat  verərək qeyd edib ki, əvvəlki vaxtlarla müqayisədə kitabxanaçılarımızın  sosial şəbəkədəki işi  təqdirəlayiqdir. ZOOM proqramı ilə təşkil olunan videokonfranslara getdikcə daha  çox  kitabxanaçı qoşulur.

    Xocalı faciəsinin 29-cu ildönümü ilə əlaqədar bütün kitabxanalarımızda Xocalı faciəsinə həsr edilmiş  sərgilər təşkil edilmişdir.